انا و التدوين و الكلام
هو المفروض كما جرت العادة تكون دي هي التدوينة الاولى حيث المفروض ان اتكلم عن الاسباب القوية و المهمة و البالغة الخطورة التى اللى دفعت سعادتى للتدوين :-) بس مش مهم انا هكتب ايه اللى دخلنى سلك المدونيين
ـ
في البداية انا زي الغالبية اللى سمعت عن التدوين ايام الحرب على العراق و اللى اعتقد انها كانت الفترة الذهبية للمدونون و التدوين بس لظروف الاتصال البطئ والانشغال في العمل لم يكن هناك وقت للبحث في الموضوع و ان كان كل فترة اسمع ان التدوين هو الثورة الجديدة على النت و انه بدأ في اخذ مساحة كبيرة من الاخبار المتداولة
ـ
أول لقاء لى مع التدوين كان لازم يكون تقنى بما انى مهتم بالدرجة الاولى باخبار التقنية و كانت البداية من موقع البوابة العربية للأخبار التقنية(موقع ملوش دعوة بالتدوين خالص) اللى كان طارح حوار حول أكثر المواقع زيارة من قبل المستخدمين العرب للزوار و كان رد احد الزوار انها مدونة التقنية بضغطة هي مصدر الاخبار بالنسبة له فدخلت عليها و وقعت في غرامها من أول زيارة و اصبحت مصدري التاني للاخبار التقنية بعد البوابة العربية و خاصة مع التطور في السرعة و الوصول لعصر DSL الحكاية اصبحت اسهل و مش محتاجة مجهود
ـ
و فضلت فترة لا علاقة لى بالتدوين الا من خلال التقنية بضغطة حتى جاء موضوع تذكرتين سينما على موقع عشريات حول فيلم V for vendetta و اللى كان بيعرض الفلم من وجهة نظر شريف نجيب و معاذ الزغيمي و بدات البحث عن مدونة شريف نجيب اللى موقع عشرينات بينقل عنها تحليل الفيلم و طبعا و صلتلها بسرعة عن طريق الاخ جوجل و نفس الوقت أثير موضوع منال و علاء و القبض على علاء بسبب التدوين
ـ
ممكن أقول ان الوصول لمدونة شريف نجيب هدوء نسبي هي الانطلاقة الحقيقية بفضل المدونات اللى على الجنب و من مدونة للآخرى دخلت الموضوع و كبداية بحثت عن موقع للتدوين و يكون بالعربي من باب دعم المواقع العربية و ناحية آخرى كبداية لمعرفة المميزات و للأسف الحظ و قعني في موقع جيران و هو الصراحة موقع سهل و بسيط بالنسبة لمبتدئ زي، بس الصراحة الاعلان اللى بينط في وشى كل ما دخلت على المدونة خنقى فبدأت البحث في المواقع العالمية و الحمد لله و قعت واقف المرة دي في موقع بلوجر و من هنا بدات التدوين و بدات اعرف مميزات بلوجر عن طريق الشرح الرائع لـ بنت مصرية و دوست في الموضوع وأهو بقيت مدون زي فل بيكتب كلام و بس
Labels: كلام تدوين
posted by Homam @ 12:52 am
4 Comments:
thanks for adding me in your
"ناس بتتكلم برضه" list
ibrahim
العفو يا ابراهيم بس مدونتك حلوة جدا
و في انتظار الجديد
امتى هنشوف موضوع (كيفية إنشاء مدونه) في زنزانه ياهمام
مع اني عندي يقين ان ماحدش هيعمل بيه حاجه ولا حتى انا
انا فكرت كتير وحابب الموضوع بس ماعتقدش اني هعمله
وبالتوفيق ياهمام
واحد من الزنزانة:
اعترف انت مين!
على الفكرةالموضوع موجود بس مش فاضى انزله ان شاء الله في اقرب وقت
Post a Comment
<< Home